Жемятдин вилик гьахъ-гьисаб авуна

Д. Шерифалиев

16-декабрдиз Ахцегьрин гуьне патан жемятдин сход кьиле фена. Анал кIватI хьанвай  вишев агакьна агьалийрин вилик «сельсовет Ахтынский» СП-дин кьил Мирзамегьамед Робертович Таджибова «2013- йисан кIвалахдин нетижайрин гьакъиндай» - куьруь доклад авуна.

Кьилди къачуртIа, ада къейд авувал, жемятдин кьадардал ва абурун истемишунрал гьалтайла шегьердиз барабар Ахцегь райцентрада яшайишдин манадин лап хци месэлайрикай сад хъвадай цинди я. Къ. Межидован, А.Аливердиеван, Шарвилидин, С. Сулейманан, тIварарихъ галай куьчейра цин турбаяр гуьнгуьна хутуна, ахцегьвияр ара датIуз михьи целди таъминариз алакьнава. Еке фикир гъилевай йисан къене  куьчеяр дуьзмишунин месэладизни гана: Г.Палчаеван. С.Сулейманан, Я.Мегьамедан, Г.Султанован, Герейханован, А.Агъаеван, С.Калантарован, Къ.Межидован тIварарихъ галай куьчейра йифен эквер хутуна, къир тунвай  рекьера хьанвай фурар ахцIурна,  пара чкайриз гравий вегьена, рекьериз дугунардай ятар акъуддай серенжемар кьабулна ва икI мад.

Сходдал веревирд ийизвай месэладай хейлин ксар рахана. Агъадихъ чна куь фикирдиз куьрелди бязибурун фикирар гъизва.

АбдулмутIалиб Велиханов: - Хъвадай цихъ галаз санал гила дугунардай цин месэлани къайдада гьатнавайди аквазва. Виликан йисара райцентрадикай хкатнавай чилин участокриз дугунардай яд хъсандаказ акъат тийиз, чун кIеве гьатзавайтIа, йифиз ятар гуниз мажбур тиртIа, хуьруьн администрациядин ва депутатрин алахъунрин нетижада и месэла саки къакъатнава.

Шимардан Мурадов: - Зун СтIал Сулейманан тIварунихъ галай куьчеда яшамиш жезвай кас я. Машинринни инсанрин еке гьерекат квай дар рехъ гегьеншарун патал за жуван гьаятдин цал къенез чIугвазвай. И кар акуна хвеши хьайи ТIажибова «валай къуншийрини чешне къачунайтIа, рехъ кьве машин садад-садан патавай къакъатдайвал гегьенш жедай» лагьана, заз 15 чувал цемент ва асбестдин кьве туба гана.

Играм Къурбанов: - Исятда чун авай М.Айдинбегован тIварунихъ галай и клуб ва ял ядай парк яргъал йисара гьихьтин чкIай гьалда авайтIа, чун вири шагьидар я. И месэладин гьакъиндай хуьруьн администрациядиз арза авунмазни са куьруь вахтунда и багъ туькIуьр хъувуна, рекьикай цийи цал эхцигна, клубдин чинин цлаз сувагьар хъияна. Жемятдн гьич са арзани Мирземегьамед ТIажибова къайгъусуз тазвач, алакьдай куьмек ийизва.

Рамалдин Мусаев, районда ГБДД-дин кьилин Госинспектор: - Ахцегьа рекьерин хатасузвал хуьнин месэлайрай хуьруьн администрациядин кьилихъ галаз чун  ара-ара сад-садал гьалтзава. Разивилелди лугьун, и мукьва чи истемишунар фикирда кьуналди ада В.Ленинан, А.Байрамован, В.Эмирован куьчейра ремонтрин кIвалахар кьиле тухуз, мектебринни аялрин бахчайрин вилик ва чна къалурай бязи маса чкайрал рекьерин махсус лишанар эцигиз туна. И кардай за адаз ва хуьруьн администрациядин вири коллективдиз чухсагъул лугьузва.

Арсен Агъаев: - Иллаки еке фикир, жемятдин теклифдалди, чкадин администрацияди райцентрадин цIийиз арадал атана, гьеле бегьем къайдада гьат тавунвай  мягьлейризни куьчейриз гузва. Дугунардай ятар рекьера гьат тавун патал нагагь асбестдин турбаяр чара йизвачиртIа, неинки машинривай, гьакI инсанривайни анра  къекъвез жедачир.

Асланбег Алиев: - Чи куьчедизни токдин симер-шалманар гъиз кьумекунай (тIалабнамазни герек материал гъана вегьена) за чи куьчедин вири агьалийрин мецелай Мирземегтамед стхадиз сагърай лугьузва.

Сходдал гьакI хуьруьн попечительский Советдин председатель Назир ТIажибов, Ахцегьрин 2-нумрадин юкьван чирвилерин мектебдин директор Малик Мирзоев, Ахцегьрин 2-нумрадин спортсшколадин муаллим Абдул Жалилов, пенсионерар тир Велидин Чубанов, Шагьбан Менафов ва масабур рахана. Абуру Ахцегьрин хуьруьн администрациядин кIвалахдилай чпин разивал  къалурна, рехъ ганвай бязи нукьсанар туькIуьр хъувун теклифна ва 2014-йисуз халкьдиз къуллугъуна мадни еке агалкьунар хьана кIанзавайдан гьакъиндай чпин мурадар лагьана.

Гьа ихьтин мана-метлебдин мярекат пакад юкъуз, 17-декабрдиз, Ахцегьрин къуза патан Гьакьар мягьледин майдандални жемятдихъ галаз кьиле фена.  

    Санлай къачурла, анал рахай вири ксарин фикир саки сад тир: «Дугъриданни, кьиле Мирзамегьамед ТIажибов аваз, Ахцегьрин хуьруьн Советдин администрацияди халкьдин къуллугъда хейлин кIвалахар авуна. ЦIи кранра хъвадай, къаналра дугунардай ятар хьана, алакьдайвал рекьер-хулар туькIуьрзава, йифиз куьчейра эквер ава, зир-зибилар гьар юкъуз тухуз гадарзава ва икI мад. Амма гьялиз тахьанвай месэлаярни пара я: жемятдиз чпин участокрин полицейскияр, хуьруьн ва райондин Собранийрин депутатар чизвач ва  халкьдин арада абурун, гьакI общественный, агъсакъалрин, ветеранрин Советрин кIвалах малум туш; куьчейра иесисуз кицIерин хаталу лужар пара хьанва; сурар лазим тирвал къайдада хуьн ва абурухъ гелкъуьн таъминариз жезвач. Амма халкьдин яшайишдин метлеб авай виридалайни жавабдар ва эвелимжи гьялна кIанзавай четин месэла, гьелбетда, Ахцегьар газламишунинди я. ХъуьтIуьн аязризни килиг тавуна, чара ат\ай инсанри и месэла хсуси харжийрихъ ва мелерин къайдада кьиле тухузва ва эвездин пулар абурув ахгакьдатани чидач. Алукьзавай 2014-йисуз халкьдин тIал-квал алай и месэлайриз хуьруьн ва райондин регьбери кьетIен фикир гудайдак чна умуд кутазва».

Подвал